اسلام آباد۔8اگست(اے پی پی) سپیکر قومی اسمبلی سردار ایاز صادق پارلیمنٹ لاجز دی توسیع دے منصوبے کوں وختی مکمل کرݨ دی ہدایت کریندے آکھیے جے مزید دیر تھئی تاں ذمہ واراں دے خلاف قانونی کاروائی تھیسی۔ قومی اسمبلی سیکرٹریٹ موجب سپیکر قومی اسمبلی منصوبے دی لاڳت اچ ودھارے دا سخت نوٹس ڳھدا تے منصوبے کوں وختی گھٹ توں گھٹ پیسیں اچ مکمل کرݨ دا حکم ݙیندے آکھیے منصوبیں دی تعمیر تے لاڳت دے حوالے نال مزید دیر برداشت نہ کیتی ویسی کیوں جو منصوبے دی دیر تھیوݨ پاروں ارکان پارلیمنٹ کوں اوکھ دا سامݨا اے تے ٻہوں واری آپݨے خدشات ݙسا چکئن ۔ سیکرٹریٹ موجب سپیکر قومی اسمبلی دی خصوصی کوششاں پاروں پارلیمنٹ لاجز اچ توسیع دے منصوبے تے کم جاری اے۔ سپیکر سردار ایاز صادق منصب سنبھلیندے ہی ایں منصوبے کوں وختی مکمل کرݨ دا حکم ݙتا ہئی تے ایں منصوبے دے حوالے نال متعلقہ اداریں نال ٻہوں واری میٹنگز کیتن۔ سپیکر دیاں کوششاں پاروں منصوبے دی تعمیر سانڳے مطلوبہ فنڈزوی ݙتے ڳئن۔ سپیکر تاخیر دی صورت اچ سارے متعلقہ اداریں دے خلاف قانونی چارہ جوئی دا حکم ݙے ݙتے۔ سی ڈی اے سپیکر کوں یقین ݙیوائے جو پارلیمنٹ لاجز اچ توسیع دا فیز ون موجودہ مالی سال اچ مکمل تھی ویسی ۔ سپیکر پارلیمنٹ لاجز اچ توسیع دا فیز ٹو اڳلے مالی سال تئیں مکمل کرݨ دی ہدایت کیتی ۔ گزریل دور اچ فنڈز نہ ہووݨ پاروں منصوبہ تعطل دا شکار رہیا۔ موجودہ بجٹ اچ موثر کفایت شعاری کرتے کئی سالاں توں رکیے ایں منصوبے سانڳے مطلوبہ فنڈز ݙتے ڳئن
